د پوهنې وزارت سرپرست د لوګر ولایت تعلیمي وضعیت او د ط.الب العلمانو آزموینې بهیر وڅاره
د پوهنې وزارت سرپرست الحاج مولوي حبیب الله آغا نن د یو لړ پوهنیزو چارو ترسره کولو لپاره لوګر ولایت ته ولاړ او هلته یې د پوهنې ریاست رهبرۍ، سیمه ییزو مسئولینو او علماء کرامو سره د کتنو ترڅنګ، د ثانويه او مافوق ثانویه مرحلو د آزموینو ارزونې په موخه، د مدارسو د ط.الب العلمانو له آزموینې بهیر څخه هم لیدنه وکړه.
د پوهنې وزارت سرپرست د یادو آزموینو څخه د کتنې پر مهال، ګډون والو ته د علم او پوهې پر ارزښت ګټورې او ارزښتناکې تفصیلي خبرې وکړې او هغوی یې وهڅول، تر څو د دنیا او آخرت د بریالیتوبونو ترلاسه کولو او د هېواد د هر اړخیز پرمختګ لپاره خپل ځانونه په دیني او عصري علومو سمبال کړي.
په ورته وخت کې نوموړي د لوګر ولایت پوهنې ریاست مسئولینو سره د ځانګړې ناستې پر مهال، د یاد ولایت د ښوونیز او روزنیز وضعیت او ننګونو په تړاو خبرې وکړې، د سیمه ییزو مسئولینو نظریات او وړاندیزونه یې واورېدل او د ستونزو په حل کې یې د همکارۍ ژمنه وکړه.
