د پوهنې وزارت مشرتابه پلاوي په اروپايي هېوادونو کې د مېشتو افغانانو له استازو سره وکتل

د پوهنې وزارت مشرتابه پلاوي د یوې غونډې په ترڅ کې په اروپايي هېوادونو کې د مېشتو افغانانو له استازو سره ولیدل او ورسره یې د پوهنې اړوندو مسایلو په تړاو هراړخیز بحث وکړ.

په پیل کې د پوهنې وزارت د ښوونې او روزنې معین الحاج مولوي سخاء الله «سعید»، یاد وزارت ته د ۱۴ کسیز پلاوي له راتګ هرکلی وکړ او د دوی دغه سفر یې د پوهنیز نظام د لا پیاوړتیا لپاره مهم وباله.

ورپسې د پوهنې وزارت د سرچینو او ادارې معین الحاج مولوي صبغت الله «وصیل» هم د پورته ذکر شوي پلاوي د نظرونو او وړاندیزونو په تړاو څرګنده کړه: ننګونې باید په فرصتونو بدلې شي او د هېواد بچیانو روښانه راتلونکې او د ښوونې، روزنې لا پراختیا په موخه په ګډه کار ترسره شي.

دغه راز د پوهنې وزارت د کیفیت تضمین معین الحاج مولوي عبدالخالق «صادق» په خپله وینا کې پلاوي ته ډاډ ورکړ چې د پوهنې وزارت به په هېواد کې د پوهنې د ودې او لا پرمختګ لپاره هر ډول هڅې ونه سپموي او د پلاوي نظرونه او وړاندیزونه به د افغانستان اسلامي ا/مارت له مشرتابه سره شریک کړي.

غونډه د دعائیې په لوستلو سره پای ته ورسېده.