له مرکز او ولایتونو څخه د پوهنې لنډ خبرونه
لغمان
د لغمان ولايت د اليشنګ ولسوالۍ د صبرآباد کلي اوسېدونکي مير افغان صافي په خپل شخصي لګښت د احمد خان صافي د لومړني ښوونځي لپاره څلور درسي ټولګي، د ښوونځي حلقوي دېوال او د اوبو يوه څاه جوړوي. د پوهنې ریاست مسوولینو او قومي مشرانو د ښاغلي صافي د هېوادپالنې له احساسه ستاینه وکړه.
هرات
په هرات ولایت کې د نیالګیو د کېښنولو کمپاین د دغه ولایت د والي مولانا نوراحمد اسلام جار، د پوهنې رئیس مولوي عبدالله امیني او د دغه ولایت د ادارو د رئیسانو او مسوولینو په حضور کې د هرات په بام کې ترسره شو. د چارواكو د معلوماتو له مخې: په پام كې ده چې د هرات ښار په بېلابېلو سيمو كې څلوېښت زره نيالګي کېنول شي چې له دې جملې څخه شاوخوا پنځه زره يې ښوونځيو او دولتي ادارو ته ځانګړې شوي دي.
کندز
د کندز ولایت د خیابان له دارالعلوم څخه د ۳۲ تنو فاضلانو فراغت غونډه د پوهنې د مسوولینو، علماوو، د فارغانو د والدینو او استادانو په حضور کې جوړه شوه. ګډونوالو د علومو پر ارزښت او د علماوو د لوړ مقام په باب خبرې وکړې او د ټولنې پر وړاندې یې د دغو فارغانو پر مسوولیت ټینګار وکړ.
کابل
د خاک جبار ولسوالۍ د پوهنې آمر مولوي صلاح الدین ایوبي او د پوهنې د څارنې غړو د OCCD موسسې له استازو سره وکتل، د یادې ولسوالۍ مسوولینو د پوهنې پر ستونزو خبرې وکړې او په دې برخه کې یې د مرستو غوښتنه وکړه. چې د يادې ادارې استازو ژمنه وکړه، چې يادې ستونزې به له مرکزي دفتر سره شریک کړي، ترڅو د حل لارې چارې ورته لټوي.
کابل
د کابل ولایت د میربچه کوټ ولسوالۍ د پوهنې آمریت مشرتابه د دې ولسوالۍ د ولسوال، د علماوو شورا د رئیس او د دې ولسوالۍ د امنیتي مسوولینو په مرسته د میربچه کوټ د ښوونځیو د زده کوونکو ترمنځ د سیرت النبي سیالۍ پیل کړه، چې له 120 تنو ګډون کوونکو څخه ازموینه واخیستل شوه.
