له ولایاتو څخه د پوهنې خبرونه
بادغیس:
د بادغیس ولایت د جهادي مدرسې له زده کوونکو څخه د لوړې دورې او ټولو درجو ازموینه پیل شوه.
د دغه ولايت د پوهنې رئيس مولوي محب الله احسان د يادې ازموينې د څارنې پرمهال د يادې مدرسې له مسوولينو او ښوونکو مننه وکړه، چې د پوهنې د کيفيت په لوړولو کې يې هڅې کړې او په دې برخه کې يې د نورو نوښتونو او هڅو غوښتنه هم وکړه .
فاریاب:
د فارياب ولايت د پوهنې مسوولين وايي: د عمومي زده کړو لپاره زرګونه درسي کتابونه له مرکز څخه د دغه ولايت پوهنې رياست ته استول شوي او ياد کتابونه به د ښوونځيو د زده کوونکو د شمېرو په پام کې نيولو سره د ولسواليو د پوهنې آمریتونو ته ووېشل شي. .
پنجشیر:
د پنجشير ولايت د پوهنې رئيس مولانا غلام ایشان حماس له خپلو کارکوونکو سره غونډه وکړه او د هغو کسانو د اسنادو د ارزونې او استخدامولو په باب يې خبرې وکړې چې د ښوونکو لپاره د کانکور په ډله ايزه رقابتي ازموينه کې ریزرف شوي وو.
سرپل:
د اکتید دفتر مسوولینو د سرپل ولایت د پوهنې له رئیس مولوي محمد رحماني سره وکتل.
د سرپل د پوهنې رئیس د اکتید دفتر له مرستو څخه د مننې په ترڅ کې د دغه دفتر له مسوولینو څخه د لا زیاتو مرستو غوښتنه وکړه، چې د هغوی له خوا ومنل شو.
لوګر:
د لوګر د پوهنې ریاست چارواکي وايي: IRC موسسې د دغه ولایت د پوهنې ریاست سره په همغږۍ د دغه ولایت د ۲۲ ښوونځیو د ۱۰۰ تنو ښځینه او نارینه ښوونکو لپاره یې په ښوونځیو کې د پوهنې د کیفیت د لوړولو په موخه د ظرفیت لوړونې سیمینار جوړ کړ.
