له ولایاتو څخه د پوهنې د فعالیتونو لنډ خبرونه

پروان:
د آغاخان موسسې له خوا د پروان ولایت د سرخ پارسا او شیخ علي ولسوالیو د ښوونځیو آمرینو او سرښوونکو ته د ظرفیت لوړونې، مدیریت او رهبرۍ، د مېتودولوژۍ او پلان جوړونې په اړه ۱۵ ورځنی ورکشاپ جوړ شو. د دې ولایت د پوهنې رئیس مفتي محمد حسن حقاني په پروان کې د آغاخان موسسې له فعالیتونو څخه خوښي څرګنده کړه او د دې ادارې له مسوولینو یې وغوښتل چې د دغه ولایت په نورو سیمو کې هم ورته فعالیتونه ترسره کړي.
هرات:
د هرات ولایت د الجامعه الصدیقه مدرسې څخه په لوړو او منځنیو دورو کې او د قرآن کریم  د حفظ له دورې څخه د ۵۱ تنو قاري صاحبانو د دستاربندۍ مراسم د پوهنې د مسوولینو، علماوو، د مدارسو د ښوونکو او د زده کوونکو د والدینو په ګډون ترسره شول.
 د هرات ولايت د پوهنې ريس په ټولنه کې دعلم پر ارزښت او په ټولنه کې د ديني عالمانو د مقام په باب خبرې وکړې او د قاري صاحبانو فراغت يې د ټولنې لپاره ارزښتناک او ستر وياړ وباله
لوګر:
د لوګر ولایت د مرکز او ولسوالیو د پوهنې د مسوولینو په ګډون یوه غونډه جوړه شوه،  په دې غونډه کې د مسوولینو د اصلاحي وړاندیزونو ترڅنګ د دغه ریاست د عملیاتي پلانونو، تطبیق شویو فعالیتونو او د راتلونکو پلانونو په اړه هم خبرې وشوې.
کندهار:
د کندهار ولایت په سپین بولدک ولسوالۍ کې د "تهذیب الطفال" خصوصي ښوونځي د پوهنې د مسوولینو او د زده کوونکو د والدینو په شتون کې د دغه ښوونځي د زده کوونکو ترمنځ علمي او تشویقي سیالي پیل کړه.
ننګرهار:
د ننګرهار د پوهنې ریاست چارواکي وايي: د جاپان هېواد د UMCA موسسې له لوري د ننګرهار ولایت د اچین ولسوالۍ د ۲۸ بابه ښوونځیو پر زده کوونکو یې لاسي کڅوړې او درسي مواد ووېشل شول.