له ولایتونو دپوهنې خبرونو لنډیز
کابل
د کابل ولایت پغمان ولسوالۍ په قلعه عمر کلي کې د تعليم القرآن په نامه دیني مدرسه پرانیستل شوه.
د دغه ديني مدرسې پرانيستلو په مراسمو کې د پوهنې آمريت مسؤلینو، دیني عالمانو، مجاهدینو او قومي مخورو ګډون کړی وو او هر یوه په خپل وار د ټولنې په اصلاح کې د دیني زده کړو او روزنې په ګټو خبرې وکړې او په دې برخه کې یې د دیني عالمانو دریځ مهم وباله.
ارزګان
د ارزګان ولایت پوهنې ریاست اداري غونډه د دغه ولایت پوهنې رئیس الحاج مولوي شمس الله اخندزاده کامران په مشرۍ د والي الحاج مولوي محمد علي جان ، پوهنې او نورو سیمه ییزو ادارو د مسؤلینو په ګډون جوړه شوه.
په دې کتنه کې د اروزګان والي د علومو د زده کړې پر ارزښت خبرې وکړې او له پوهنې رياست سره يې د همکارۍ د دوام ژمنه وکړه.
هرات
د هرات ولايت پوهنې رئيس مولوي عبدالله اميني د دغه ولايت جهادي مدرسې د څارنې او د دغې ديني مدرسې له مسؤلينو او زده کوونکو سره د ليدنې پر مهال د يادې مدرسې ستونزې او فعاليتونه هم وارزول.
پکتیا
د پکتیا ولایت پوهنې ریاست، د دغه ولایت د صدقه سوريه خیریه بنسټ او د یتیمانو مدرسې ناظم او مسؤلين د دوی د ارزښتناکو خدمتونو له امله د ستاینلیک په ورکولو سره وستایل.
د هغه ولایت پوهنې رئیس مولوي عبدالحکیم خالد وویل: زموږ یو له کاري لومړیتوبونو څخه د یتیمانو سره مرسته او هغوی ته د زده کړو آسانتيا برابرول دي.
لوګر
د لوګر ولایت پوهنې رئیس مولوي جنت ګل عزیز د دغه ولایت ازرې ولسوالۍ د پوهنې له آمريت څخه لیدنه وکړه او د دغه آمريت ښوونیز فعالیتونه یې له نيږدې وکتل.
نوموړي د منګل لېسې آزموينې له بهير څخه د ليدنې تر څنګ د ازرې ولسوالۍ د ښوونکو او پوهنې تدريسي فعاليتونو ستاينه وکړه او مسؤلينو ته يې د چارو د لا ښه والي په موخه لازمې لارښوونې وکړې.
