له ولایتونو څخه د پوهنې خبرونه
بلخ
د بلخ ولايت په نهر شاهي ولسوالۍ کې د امير علي شير نوايي منځني ښوونځي د حلقوي دېوال د جوړولو په اړه مشورتي غونډه د يادې شوې پروژې له انجنيرانو سره د يادې ولسوالۍ د پوهنې آمر تر څارنې لاندې جوړه شوه.
د چاهی ولسوالۍ د پوهنې آمر د پوهنې آمریت له مسوولینو، ولسوال او د دې ولسوالۍ د امنیتي ادارو له مسوولینو سره په یاده ولسوالۍ کې د سیمه ییزو ښوونیزو ټولګیو د جوړولو او فعالیتونو په باب مشورتي ناسته وکړه.
د مارمل ولسوالۍ د پوهنې آمریت مسوولینو د ملا افغان منځني ښوونځي له درسونو څخه څارنه وکړه.
نوموړو د ښوونځي له مسوولینو سره له نږدې خبرې وکړې او د هغوی ستونزې یې واوریدې.
فراه
دفراه ولایت په مرکز کې د ابونصر فراهي لېسې زده کوونکو د روژې د مبارکې میاشتې په مناسبت د قرآن عظیم الشان ختم وکړ او د هېواد د پرمختګ او سرلوړۍ او د پوهنې د پرمختګ لپاره یې دعا وکړه.
د یاد ولايت د پوهنې رئيس مولوي اختر محمد زعيم د زده کوونکو دغه نیک اقدام وستايه.
هلمند
د هلمند ولایت د پوهنې رئیس مولوي محمد عوض انصاري د یوه کاري سفر په ترڅ کې د دغه ولایت د نوزاد ولسوالۍ له ښوونځیو او دیني مدارسو څخه لیدنه وکړه.
نوموړي د دغه سفر په ترڅ کې د شهید سردارولي له منځني ښوونځي څخه هم لیدنه وکړه، ځکه دغه ښوونځی د وروستیو سیلابونو له امله ویجاړه شوې وه. د کتنې ترڅنګ د درسي ټولګیو لپاره یې تورې تختې، غالۍ او کتابچې ووېشلې او د بیارغاونې په موخه یې مسوولینو ته لازمې لارښوونې وکړې.
لغمان
د لغمان د پوهنې ریاست د ښوونې او روزنې آمر او ورسره مل پلاوي د ASDOموسسې له مسوول سره یو ځای د شمسه خېلو او انجیل کلي له ښوونځیو او د فراشغان له پنځو سیمه ییزو ټولګیو څخه لیدنه وکړه او د پوهنې د بهیر د ښه والي په موخه یې لازمې لارښوونې وکړې.
