له ولایتونو څخه د پوهنې خبرونه
پروان
د پوهنې وزارت د ښوونې او روزنې معین الحاج سخاء الله سعید او ورسره مل پلاوی د نوي ښوونیز کال له پیل سره سم د دغه وزارت د پلانونو او لارښوونو د عملي کولو په موخه پروان ولایت ته ولاړ.
د پوهنې وزارت د ښوونې او روزنې معین د پروان د پوهنې ریاست د کړنو د ستاینې په ترڅ کې د پوهنې له کارکوونکو څخه وغوښتل چې د پوهنې د نظام د پرمختګ او هوساینې لپاره له شته فرصتونو څخه سمه ګټه پورته کړي.
د پروان ولایت د پوهنې رئیس مفتي محمد حسن حقاني په دغه ولایت کې د پوهنې وزارت مرستیال ته د ښه راغلاست تر څنګ د پروان ولایت د پوهنې د پرمختګونو او شته ننګونو په باب هر اړخیز راپور وړاندې کړ.
لغمان
د پوهنې وزارت د نتایجو او شهادتنامو رئیس الحاج مولوي صبغت الله وصیل او ورسره مل پلاوی د پوهنې ریاست د اداري، مالي او تدریسي چارو د ارزونې او څارنې په موخه لغمان ولایت ته ولاړ.
په پيل کې د ياد شوي ولايت د پوهنې رئيس مولوي شاه جهان ساجد راغلو مېلمنو ته ښه راغلاست ووايه او د خپل کاري راپور د وړاندې کولو پر مهال يې په يادو ولايت کې د نتایجو او شهادتنامو د وېش لپاره د برېښنايي سيسټم د جوړېدو خبر هم ورکړ.
د پوهنې وزارت د نتایجو او شهادتنامو رئیس په داسې حال کې چې د پوهنې ریاست له بېلابېلو څانګو څخه هم لیدنه وکړه، د لغمان د پوهنې ریاست د نتایجو او شهادتنامو له مدیریت څخه هم لیدنه وکړه او د چارو پر لا ښه پرمختګ یې ټینګار وکړ.
د لغمان ولايت د پوهنې رياست وايي: د ښوونځيو زده کوونکو ته د درسي کتابونو د وېش په دويم پړاو کې د پوهنې وزارت له خوا د يونيسف ادارې په مرسته ۲۱۷ زره او ۶۶۰ سوه ټوکه نور کتابونه هم ورکړل شوي، چې ډېر ژر به د دغه ولايت د پوهنې آمریتونو ته ولېږدول شي.
د غزني ولايت په اجرستان ولسوالۍ کې د پوهنې د مسوولينو، ديني عالمانو او اوسېدونکو په ګډون د يوې سترې غونډې په ترڅ کې د دې ولسوالۍ د محمدخېلو کلي د مدرسې د يو شمېر د قرانکریم د حافظانو او فاضلانو فراغت ونمانځل شو.
د بغلان ولايت د پوهنې رئيس الحاج مولوي محمد نور عزيزي د دغه رياست د بيلابيلو څانګو له اداري چارو څخه ليدنه وکړه او د کارکوونکو د کاري نظم او له مراجعينو سره يې پر ښه چلند ټينګار وکړ .
