له ولایتونو څخه د پوهنې خبرونه
غور
د غور د پوهنې ریاست د مشرتابه او غړو، د ولایت مقام د استازي، د سیمه ییزو ادارو رئیسانو، دیني عالمانو، ښوونکو او د مدارسو زده کوونکو په ګډون د یوې ځانګړې غونډې په ترڅ کې د دغه ولایت د جهادي مدرسې درسونه په رسمي توګه پیل شو.
د غور ولایت د اسلامي زده کړو آمر شیخ عبدالجبار ثاقب په دې غونډه کې د پوهې او علماوو د ارزښت په اړه خبرې وکړې او د دغه ولایت له ټولو خلکو یې وغوښتل چې د علماوو مقام ته درناوی وکړي او خپل اولادونه وهڅوي، ترڅو عصري او دیني زده کړي وکړي.
نورستان
د نورستان پوهنې ریاست د پوهنې وزارت د طرزالعملونو په رڼا کې د نورستان ولایت ټولو اوسېدونکو ته د متوازنو خدمتونو د وړاندې کولو په موخه د نورستان ولایت د منډول ولسوالۍ په لرو پرتو سیمو کې له نوماندانو څخه د ازادې سیالۍ له لارې د ښوونکو ازموینه واخیستله.
ارزګان
د ارزګان ولایت پوهنې رئیس الحاج مولوي کامران آخندزاده او په دغه ولایت کې د یونیسف د سیمه ییز دفتر استازي د ملالۍ او سرشخلي ښوونځیو څخه لیدنه وکړه، د تدریسي بهیر د ارزونې پرمهال یې د درسي وانیو د ستونزو، د څښاک او پاکو اوبو د نشتوالي ستونزې یې له نږدې وڅېړلې.
د يونيسف ادارې استازي له پوهنې آمریت څخه وغوښتل چې د يادو ښوونځيو ټولې اړتياوې په رسمي ډول وړاندې کړي، ترڅو رسیده ګي ورته وشي.
غزني
په مقر ولسوالۍ کې له احمدیه مدرسې څخه ۹ تنه فاضلان د یو لړ مراسمو په ترڅ کې فارغ شول.
په دې غونډه کې د غزني پوهنې رئیس او مشرتابه، دیني عالمانو او د ولسوالۍ ګڼ شمېر اوسېدونکو ګډون کړی وو.
د غزني ولایت پوهنې رئیس مولوي میر نصیر احمد حسیني یادو فاضلانو ته د فراغت مبارکي وویله، حافظان یې د انبیاوو ریښتیني وارثان وبلل او د دیني او عصري علومو پر زده کړې یې ټینګار وکړ.
غزني
د غزني پوهنې رياست وايي: د پوهنې ریاست د مسوولينو، ديني عالمانو او ځايي خلکو په ګډون د يو لړ مراسمو په ترڅ کې د دغه ولايت د جهادي مدرسې درسونه پيل شول.
په دې مراسمو کې د غزني پوهنې رئيس د لازمو موضوعاتو په باب د خبرو په ترڅ کې د غزني له خلکو وغوښتل چې خپل ماشومان د زده کړې او د علم د ترلاسه کولو په موخه دې مدرسې ته واستوي.
