له ۶۰۰ تنو کډوالو زده کوونکو څخه د سویې د تثبیت آزموینه واخیستل شوه
د کابل ښار پوهنې ریاست، هېواد ته د راستنېدونکو ۶۰۰ تنو زده کوونکو څخه د سویې د تثبیت په موخه آزموینه واخیسته.
په هغو مراسمو کې چې د همدې آزموینې د پرانیستل کېدو په هدف، د کابل ښار پوهنې ریاست د غونډو په تالار کې جوړ شوي وو، پکې د پوهنې وزارت ښوونې او روزنې معین او کفیل الحاج مولوي سخاءالله "سعید"، د کابل ښار پوهنې رئیس قاري عبدالباسط"حقاني"، مسئولینو او زده کوونکو ګډون درلود.
په پیل کې د کابل ښار پوهنې رئیس مېلمنو او ګډون والو ته د ښه راغلاست ترڅنګ، د کډوالو زده کوونکو لپاره د هغوی د زده کړو په برخه کې د هراړخیزو آسانتیاوو برابرولو ډاډ ورکړ او زیاته یې کړه: دا زموږ مسئولیت دی، تر څو د هېواد بچیانو لپاره د دیني او عصري زده کړو زمینه برابره کړو.
ورپسې د پوهنې وزارت د ښوونې او روزنې معین او کفیل وویل: د ا.ا.ا. د پوهنې وزارت ژمن دی چې د هېواد ټولو بچیانو او راستنېدونکو ځوانانو ته د دیني او عصري زده کړو فرصت برابر کړي.
نوموړي څرګنده کړه، چې یاد وزارت د ټولو کډوالو زده کوونکو او ماشومانو د علم او پوهې د زمینې برابرولو لپاره بشپړ چمتووالی نیولی او له زده کوونکو یې وغوښتل، چې د خپل ګران هېواد افغانستان د هراړخیز پرمختګ لپاره په ګډه کار وکړي.
د مسئولینو په وینا، ټاکل شوې ده، چې د یادې آزموینې بریالي ګډون وال به د هغوی له خپلو تعلیمي سویو سره سم د زده کړو د دوام په موخه، د ښوونځیو په یوولسم او دولسم ټولګیو کې شامل شي.
غونډه د مبارکې دعائیې په لوستلو سره پای ته ورسېده.
