په پروان ولایت کې د یوې دیني مدرسې ودانۍ پرانیستل شوه
د پروان ولایت بګرام ولسوالۍ په قره چه کلي کې "د تعلیم القرآن للبنات دیني مدرسه"، چې د سیمه ییزو خلکو او چارواکو په مرسته د یو مېلیون افغانیو څخه په زیات لګښت سره جوړه شوې وه، د پوهنې رئیس، چارواکو، علماءکرامو او مشرانو په حضور کې افتتاح او ګټې اخیستنې ته وسپارل شوه.
یاده مدرسه چې د ۱۲۰۰ متره مربع مساحت سره په یوه پوړ کې په پاخه او اساسي ډول جوړه شوې، ۳ درسي خونې، شاوخوا احاطوي دېوال او نور اړین ملحقات لري.
په همدې موخه جوړه شوې غونډه کې؛ د پروان ولایت پوهنې رئیس محترم مولوي سید محمد فیضي مېلمنو او ګډون والو د ښه راغلاست پرمهال، د پوهنې وزارت د پراختیایي پلانونو او پروګرامونو په اړه خبرې وکړې او د دیني علومو لاپراختیا په برخه کې یې د یاد وزارت د مشرتابه له هڅو ستاینه وکړه.
د پوهنې وزارت رهبري د پوهنیزسیستم لپاره د خلکو له هر اړخیز ملاتړ څخه مننه کوي.
