په پکتیا ولایت کې د پوهنې وزارت د درۍ کلن ملي پلان په اړه د نظر غوښتلو غونډه جوړه شوه
هغه غونډه چې د پکتيا ولايت پوهنې رياست کې د پوهنې وزارت د درۍ کلن ملي پلان په اړه د بحث په موخه جوړه شوې وه، پکې د پوهنې رئیس مولوي عبدالوکيل خالد، د یاد ریاست آمرینو، مدیرانو، د ولسوالیو پوهنې آمرینو، د پوهنې وزارت د څېړنې او پالیسۍ رئیس ډاکټر عمر دوران زي، د یاد ولایت د پوهنتونونو استادانو او علماوو هم ګډون درلود.
د پوهنې وزارت د څېړنې او پالیسۍ رئیس ډاکټر عمر دوران زي، د یاد وزارت د درۍ کلن ملي پلان د شرایطو په اړه د غونډې ګډون والو ته معلومات وړاندې کړل او له هغوی یې وغوښتل، تر څو د یاد پلان په بډاینه کې د ونډې اخیستلو سربېره، د دغه پلان د مطالعې په برخه کې لازم اقدامات تر سره کړي.
په ورته مهال نوموړي وویل، د پوهنې وزارت د رهبرۍ د لارښوونې له مخې دا مهال د پوهنې درۍ کلن ملي پلان د هېواد په ټولو ولایتونو کې د کارپوهانو او علماوو له لوري تر تخصصي بحثونو لاندې دی، څو د الله تعالی(جل جلا له) په مرسته او د افغانستان.ا.ا. عالي مشرتابه له تصویب وروسته پلی شي.
