په کابل ښار کې یو باب ښوونځي سره د درسي توکو مرسته وشوه
د پوهنې یو تن مینه وال شخصیت، د کابل ښار په یوولسمه ناحیه کې د عبدالرحمن سیدخېلي عالي لېسې سره د ۴۰۰ زره افغانیو په اندازه مرسته وکړه، چې یادې پیسې د ۱۰۰ تنو زدهکوونکو لپاره د ۲۰۰ پایې مېزونو، څوکیو او درسي توکو پېرودلو او چمتو کولو لپاره کارول شوې دي.
په همدې مناسبت په جوړه شوې غونډه کې، د کابل ښار پوهنې رئیس محترم قاري عبدالباسط حقاني د مننې ترڅنګ وویل:"معارف زموږ ټولو ګډ کور دی او دا اړینه ده چې د هغو لاپراختیا او پیاوړتیا لپاره په ګډه کار وکړو."
بل پلو ځایی اوسېدونکو، ښوونکو او زدهکوونکو له دغو مرستو تود هرکلی وکړ او له نورو ښاریانو څخه یې هم وغوښتل چې د پوهنې په لاپراختیا کې فعاله برخه واخلي.
د پوهنې وزارت مشرتابه د پوهنیز نظام سره د علم دوسته خلکو، په ځانګړې توګه د کابل ښار د پوهنې مینه والو له مادې او معنوي مرستو مننه کوي.
