د پوهني وزارت د مدارسو او دارالحفاظونو رئیس نورستان ولایت ته سفر وکړ
د پوهني وزارت د مدارسو او دارالحفاظونو رئیس مولوي عبدالرزاق(صدیق )نورستان ولایت ته د خپل سفر پر مهال د یاد ولایت له سرپرست والي، د پوهنې له رئیس، مرکزي آمرینو، دولسوالیو د پوهنې له آمرینو، د ولایتي ادارو له مسئولینو، د مدارسو له استادانو او علماوو سره د یوې غونډې په ترڅ کې ولیدل.
د غونډې په پیل کې د نورستان ولایت د پوهنې رئیس مولوي تاج محمد مطمئن راغلي پلاوي ته ښه راغلاست ووایه او د یاد ولایت د تعلیمي بهیر په هکله یې معلومات وړاندې کړل.
ورپسې د نورستان ولایت د علماوو په استازیتوب مفتي عبیدالله سلیم او مولوي سمیع الله ویناوې وکړې او په یاد ولایت کې یې د شته تعلیمي ستونزو په هکله معلومات وړاندې کړل.
وروسته د پوهني وزارت د مدارسو او دارالحفاظونو رئیس مولوي عبدالرزاق صدیق د خپلې وینا په ترڅ کې لومړی نورستان ولایت ته په خپل راتګ سره خوښي څرګنده کړه او زیاته یې کړه، چې د پوهنې وزارت د کیفیت او کمیت له پلوه د مدارسو پرمختګ ته زیاته پاملرنه لري، چې په دې لړ کې به په لومړي قدم کې کلیوالي مدارسو ته د استادانو رسمي بستونه ورکړل شي او هم یې د پوهنې وزارت له لوري له ځان سره درې سوه زره (۳۰۰۰۰۰) افغانۍ نقدي مرسته را وړې ده، چې د ټاکلي طرزالعمل په اساس به د یاد ولایت مدارسو او دارالحفاظونو ته توزیع شي.
نوموړي د ولسوالیو د پوهنې له آمرینو څخه وغوښتل چې په پوره دقت او شفافیت سره د هرې ولسوالي د مدارسو او دارالحفاظونو احصایه را غونډه او له راغلي هیئت سره شریکه کړي ترڅو د هغوی د تمویل او ستونزو د حل په برخه کې ممکنه اجراآت ترسره شي.
وروسته د مدارسو او دارالحفاظونو رئیس د نورستان ولایت د مرکزي دارالعلوم او نورو مدارسو له آمرینو سره ولیدل، د هغوی وړاندېزونه یې واورېدل او هم یې ورسره ځیني اړینې سپارښتنې شریکې کړې.
