له ولایتونو څخه د پوهنې لنډ خبرونه
پروان
د پروان ولایت د پوهنې رئیس مفتي محمد حسن حقاني، د شهید میرعلي احمد او د تجربوي ښوونځیو څخه لیدنه او څارنه وکړه.
نوموړي د يادو ښوونځيو د درسي فعاليتونو د څارنې تر څنګ له مديرانو او ښوونکو وغوښتل، چې درسي بهير ته جدي پاملرنه وکړي. او زده کوونکي په اسلامي او ملي روحيه وروزي.
پکتیا
د پکتیا ولایت د پوهنې ریاست سکتوري غونډه د دغه ولایت د پوهنې رئیس مولوي عبدالوکیل خالد تر څارنې لاندې د سکتوري ادارو او مرستندویو بنسټونو په ګډون جوړه شوه.
په دې غونډه کې د سيمه ييزو او مرستندویو ادارو مسئولينو د خپلو کاري پلانونو د وړاندې کولو تر څنګ د دې ولايت د پوهنې له رئيس سره خپلې ستونزې او وړانديزونه هم شريک کړل.
لغمان
د قرغيو ولسوالۍ د پوهنې آمر مولوي عبدالرزاق سيار د همدې ولسوالۍ د کثير الرشتوي انستيتوت د محصلينو د فراغت په مراسمو کې ګډون وکړ.
کاپیسا
د کاپیسا ولایت د پوهنې رئیس مولوي محمد فرید حقاني د دغه ریاست له مالي او اداري مدیر سره یو ځای د دې ولایت د مرکز او ولسوالیو د ۱۲۰ تنو آمرینو او د تعلیمي څارنې غړو لپاره د ښوونکو د مسلکي ودې په آمریت کې د ظرفیت لوړونې له جوړ شوي لس ورځني ورکشاپ څخه لیدنه وکړه. نوموړي له ګډونوالو څخه وغوښتل چې د دې پروګرام سیمینار له محتوا څخه ښه ګټه پورته کړي.
په کاپیسا ولایت کې د دویمې حصې ولسوالۍ آمریت د ښوونځيو او دیني مدارسو د اداري او تدريسي چارو د لا ښه والي په موخه د دې آمریت له کارکوونکو سره کاري ناسته وکړه او په اړه يې نیکې توصیې ورته وکړې.
