د کابل ښار پوهنې رئیس، د ترکیې ښوونې او روزنې بنسټ له مسئولینو سره وکتل.
د کابل ښار پوهنې رئیس حافظ عبدالباسط حقاني، د افغان– ترک ښوونځیو د ښوونې او روزنې له مرستیال سلیمان التون او مل پلاوي سره وکتل.
په پيل کې د پوهنې رئیس میلمنو ته ښه راغلاست ووایه، او د دوو وروڼو هېوادونو،( ترکیې او افغانستان) د مسلمانو خلکو ترمنځ یې د دوستۍ ستایلو ترڅنګ، د پوهنې له وزارت سره د ترکیې ښوونې او روزنې بنسټ له دوامداره همکاریو مننه او قدرداني وکړه.
په دې کتنه کې نوموړي د یاد بنسټ له مسئولینو وغوښتل، چې د افغانستان پوهنې نظام ښه والي او ودې په موخه، له پوهنې وزارت سره دوامداره همکاري وکړي او د پوهنې له نورو څانګو سره د مرستې په ترڅ کې دې د ښوونکو او د پوهنې کارکوونکو ظرفیت لوړولو لپاره دې لنډ مهاله او اوږدمهاله زده کړو زمینې په برابرولو کې پروګرامونه په لاره واچوي.
له بلې خوا د ترکیې د ښوونې او روزنې د بنسټ مرستیال، د یاد بنسټ د پروګرامونو د تطبیق په برخه کې د لازمو آسانتیاوو د برابرولو له امله د پوهنې له وزارت څخه مننه وکړه او ژمنه یې وکړه چې د افغانستان د پوهنې نظام ترڅنګ به ولاړ وي او په دې برخه کې به دوامداره همکاري وکړي.
