د پنجشېر ولایت پوهنې ریاست کې د احصائیې مسلکي سیمینار پیل شو
د پوهنې وزارت د معلوماتو او احصائیې رئیس الحاج مولوي بسم الله نعماني د پنجشېر ولایت د مرکز او ولسوالیو د پوهنیزو بنسټونو مسئولینو، د کیفیت تضمین آمریت کارکوونکو، مدیرانو او غړو لپاره د ارقامو او احصائیوي معلوماتو راټولولو په برخه کې د وړتیا لوړونې روزنیز سیمینار پرانیست. د معلوماتو او احصائیې رئیس په داسې حال کې چې د پنجشېر پوهنې رئیس مفتي حبیب الله نوري قتاده او نورو مسوولینو هم حضور درلود، د پوهنې ریاست د ۱۸۰ تنو مسئولینو، د کیفیت تضمین مدیریت کارکوونکو او د ولسوالیو پوهنې آمرینو لپار مسلکي سیمینار پرانیست. همدارنګه نوموړي په ادارو کې د دقیقو احصائیو پر اهمیت د ټینګار په ترڅ کې وویل: که وغواړو، چې یوه منظمه او رڼه اداره ولرو او د پوهنې بودیجې څخه په سالمه توګه ګټه پورته کړو؛ نو اړینه ده چې دقیق ارقام او احصائیې له ځان سره ولرو. دغه راز نوموړي له ګډون والو وغوښتل، تر څو د یاد سیمینار له محتوا او د روزونکو له تجربو څخه اعظمي ګټه پورته کړي.
