د پوهنې وزارت د مقام د دفتر لوی رئیس د خصوصي ښوونځيو د زده کوونکو له والدینو سره مشورتي غونډه وکړه
د پوهنې وزارت د مقام د دفتر لوی رئیس الحاج مولوي شهاب الدین ثاقب، په داسې حال کې چې د خصوصي ښوونځیو او د نشراتو او عامه اړیکو ریاست مسئولینو هم حضور درلود، نن د خصوصي ښوونځیو د زده کوونکو د والدینو له استازو سره په کتنه کې، د خصوصي ښوونځيو د مقررې په محوریت تفصیلي خبرې وکړې.
د مسئولینو په وینا، له دغې ناستې څخه یې اساسي موخه، د خصوصي ښوونځیو د فعالیتونو د تنظیم په اړه د زده کوونکو د والدینو د ستونزو، نظریاتو او وړاندیزونو آورېدل وو؛ تر څو د هغو په رڼا کې نوې مقرره جوړه او په ترڅ کې یې وکولی شي، چې د خصوصي ښوونځيو د ښوونکو کاري دندې مشخصې، د ښوونیزو سیمینارونو له لارې د هغوی مسلکي وړتیاوې پياوړې، د فیسونو او نورو تعلیمي خدماتو ستونزې حل او د زده کوونکو ښوونیز او روزنیز مهارتونه لاپسې پياوړې کړو.
له بلې خوا د زده کوونکو والدینو د خصوصي ښوونیزو بنسټونو د کړنو د مقرراتو د بیا کتنې او په ځانګړې توګه د زده کوونکو لپاره د مناسبو فیسونو د ټاکلو په اړه د پوهنې وزارت د رهبرۍ له پاملرنې قدرداني وکړه او ډاډ يې ورکړ، چې دغه مقرره به د پوهنې له وزارت سره په ګډه پلې کړي.
