د افغانستان .ا.ا. د محترم عالي مقام ۱۷ مې ګڼې فرمان له مخې، پوهنې وزارت رئیسانو لپاره د احصایوي اسنادو دقت په اړه سیمینار ترسره شو

د ټولنې د ناجایزه دودونو مخنیوي په اړه سیمینار، چې د افغانستان.ا.ا. عالي مقام په فرمانونو کې روښانه شوی، د پوهنې وزارت د مرکزي څانګو رئیسانو او تخنیکي کارکوونکو لپاره د پوهنې وزارت د ښوونې او روزنې د معین او کفیل محترم الحاج مولوي سخا‌ءالله سعید، د کیفیت تضمین معین محترم الحاج مولوي عبدالخالق صادق، د مقام د دفتر لوی رئیس محترم الحاج مولوي شهاب الدین ثاقب، د یاد وزارت مرکزي څانګو رئیسانو او مسئولینو په حضور کې ترسره شو.
یاد سیمینار د پوهنې وزارت د نشراتو او عامه اړیکو د رئیس مفتي حبیب الله «قتاده نوري» لخوا د قرآن کریم د څو مبارکو آیتونو په تلاوت سره پیل شو؛ ورپسې د پوهنې وزارت د کیفیت تضمین معین الحاج مولوي عبدالخالق صادق، په ټولنه کې د ځینو ناجایزه دودونو، لکه؛ په ودونو او ماتم غونډو کې د زیاتو لګښتونو او د حج - عمرې د فریضې مراسمو او نورو برخو کې د حاجیانو د راستنېدو په اړه د افغانستان.ا.ا. د محترم عالي مقام د فرمان په اړه د سیمینار ګډون‌والو ته مفصل او هر اړخیز معلومات ارایه کړل.
دغه راز نوموړي د ټولنې واقعیتونو ته په پام سره روښانه کړه: دا ډول نامناسب او ناجایزه دودونه د اسلامي ارزښتونو او زموږ د ملي کلتور سره په ټکر کې دي؛ نو څنګه موږ کولی شو دغه ډول اعمال د اصلاح، عقل او اېمان له طریقه له ټولنې څخه لرې کړو؟
د کیفیت تضمین معین زیاته کړه: د دغه سیمینار له تنظیمولو موخه یوازې د فرمانونو تشرېح کول نه دي، بلکې موږ باید داسې ټولنه جوړه کړو، ترڅو دودونه او رواجونه پکې د اسلامي قانون په رڼا کې ځای ولري.
ورپسې د یاد فرمان لارښود د پوهنې وزارت د ستر سلاکار محترم مولوي عزیز احمد ریان لخوا ګډون والو ته ولوستل شوه.
په ورته مهال، د سیمینار په بله برخه کې د پوهنې وزارت د احصایوي معلوماتو د کیفیت او دقت په اړه معلوماتي او مسلکي موضوعات د وزارت د احصایې او معلوماتو څانګې چارواکو لخوا وړاندې شول.
په یاد سیمینار کې، د پوهنې وزارت د احصایې او معلوماتو رئیس محترم مولوي بسم الله نعماني د سیمینار د موخو په اړه معلومات ارایه او ورپسې د همدغې ادارې تخنیکي کارکوونکو ګډون‌والو ته معلوماتي پرېزنټېشن وړاندې کړ.
غونډه د پوهنې وزارت د مقام د دفتر لوی رئیس محترم الحاج مولوي شهاب الدین ثاقب لخوا په مبارکې دعائیې سره پای ته ورسېده.