غزني ولایت کې د ۱.۵ مېلیونه افغانیو په لګښت د یوې دیني مدرسې بنسټ ډبره کېښودل شوه
د غزني ولایت خواجه عمري ولسوالۍ په ده حمزه سیمه کې د "اناثیه طیبه" دیني مدرسې د ودانۍ بنسټ ډبره، د یاد ولایت پوهنې رئیس محترم الحاج مولوي میر نصیر احمد حسیني په حضور کې د ۱.۵ مېلیونه افغانیو په لګښت د ۷.۵ جرېبه ځمکې په ساحه کې د یوه سیمه ییز خیرخواه وګړي په مرسته کېښودل شوه.
په یادو مراسمو کې پوهنې رئیس، دیني علماءکرامو او ګڼ شمېر سیمه ییزو اوسیدونکو ګډون درلود.
د پوهنې رئیس په خپله وینا کې د مدارسو او ښوونځيو جوړول صدقه جاریه نېک عمل وباله او ویې ویل: "د هغو زدهکوونکو اجر چې په دې مرکزونو کې زده کړې کوي، د پورته ذکر شویو تعلیمي ادارو جوړونکو او تمویلوونکو ته هم رسېږي."
د معلوماتو له مخې، د مدرسې دغه یو پوړیزه ودانۍ چې ۶ درسي ټولګي، یوه اداري خونه، یو دهلېز، د اوبو شبکه او برېښنایي سیسټم به ولري، په جوړولو سره به یې شاوخوا ۳۰۰ تنو زدهکوونکو ته یو خوندي تعلیمي چاپېریال برابر شي.
د پوهنې وزارت مشرتابه د هېوادوالو، په ځانګړې توګه د غزني ولایت د خلکو له مادي او معنوي ملاتړ څخه مننه او قدرداني کوي.
