د پوهنې وزارت د کیفیت تضمین معین د کابل ښار پنځمې ښوونیزې حوزې اړوند د ابوذر غفاري او نوې ډېوې خصوصي ښوونځیو له آزموینو لړۍ څخه څارنه وکړه
د پوهنې وزارت د کیفیت تضمین معین الحاج مولوي عبدالخالق صادق او ورسره مل پلاوي چې د کابل ښار پنځمې ښوونیزې حوزې آمر مولوی نجم الحق یې هم ملتیا کوله، د کابل ښار پوهنې ریاست اړوند پنځمې ښوونیزې حوزې د ابوذر غفاري عالي لېسې او نوې ډېوې خصوصي ښوونځيو له آزموینو لړۍ څخه څارنه او ارزونه وکړه.
په پیل کې نوموړي د ابوذر غفاري عالي لېسې او نوې ډېوې خصوصي ښوونځیو له اداري پلاویو سره ناستې ترسره او د آزموینو لړۍ یې په ټولګیو کې په عملي توګه و ارزوله.
د کیفیت تضمین معین د آزموینو د لړۍ، محیط، کیفیت او کمیت څخه ډاډ ترلاسه کړ او د پروسې د روڼتیا، کیفیت، پایلو پروخت طی مراحل کولو، مسئولیتونو ته پاملرنې او زدهکوونکو تشویق په موخه یې اغېزناکې ویناوې وکړې.
په پای کې د یادو ښوونځیو مسئولینو د تضمین کیفیت معین له څارنې او ارزونې خوښي څرګنده او هیله یې و ښوده چې په راتلونکي کې همدا شان د ښوونځیو څخه لیدنې ترسره شي؛ ترڅو د ښوونځیو مسئولین نور هم تشویق او خپلو مسئولیتونو ته لاپسې متوجې شي.
