د پوهنې وزارت خدماتو رئیس بادغیس ولایت ته رسمي سفر وکړ
د پوهنې وزارت خدماتو رئیس محترم استاد حبیب الله خالد بادغیس ولایت ته د خپل رسمي سفر پر مهال، د یاد ولایت له پوهنې رئیس محترم الحاج مولوي محب الله احسان او چارواکو سره ولیدل.
د پوهنې وزارت پلاوي د بادغیس پوهنې رئیس سره په لیدنه کې وویل: د دې سفر موخه د توکو برېښنایي ثبت او محاسبې سیسټم پراختیا، د پیسو د لېږد تنظیم، د ډیپوګانو چارو ترتیب، د ترانسپورټي مسایلو په اړه لارښوونې، د فعالو او غیر فعالو وسایطو جلا کول او د پوهنې ریاست اړوند یو شمېر نورو ستونزو پېژندل دي.
د پوهنې رئیس د پوهنې وزارت له پلاوي څخه هرکلی وکړ او ور څخه یې وغوښتل چې د ستونزو په حل کې پوهنې ریاست سره همکاري وکړي.
