خبري اعلامیه

د هېواد د ۲۰ ولایتونو اوسېدونکو له پوهنې سره څه باندې ۶۰۰ میلیونه افغانۍ مرسته کړې ده.
د پوهنې وزارت_کابل: د ۱۳۹۸ کال په لومړیو شپږو میاشتو کې د هېواد د۲۰ ولایتونو(خوست، دایکندي، کاپیسا، میدان وردګو، سرپل، بامیانو، پنجشیر، سمنګانو، بادغیس، کندهار، بلخ، نیمروز، د کابل ولایت او ښار، هلمند، جوزجان، لوګر، هرات ، پکتیکا او پکتیا) اوسېدونکو له پوهنې سره ۶۶۲۰۰۰۶۶۱ افغانۍ مرسته کړې ده. دغه مرستې چې د څه باندې ۳۷۰ جریبه ځمکې ورکړه، د ښوونځیو بیارغونه، د درسي لوازمو ورکړه او نغدې پیسې پکې شاملې دي، د ښوونځیو د شوراګانو لخوا راټولې شوې دي.یادې مرستې د ښوونځیو له شوراګانو سره په همغږۍ، د پوهنې د مینه والو لخوا په شفاف ډول لګول شوي او مرسته کوونکو د خپلو مرستو د لګښت د څرنګوالي له بهیر څخه هم څارنه کړې ده.پوهنې وزارت، ۱۳۹۷ ل کال له پوهنې څخه د ملاتړ د کال او ورپسې یې له ۱۳۹۷ څخه تر ۱۴۰۹ کال پورې د پوهنې د لسیزې په نوم نومولي دي، چې د افغانستان د اسلامي جمهوریت د جمهور رییس لخوا هم تایید شوي دي.پوهنې وزارت، ژمن دی چې د پوهنې لسیزه په هېواد کې د پوهنې د ستونزو د پای ته رسېدو لسیزه وي.پوهنې وزارت له هېوادوالو څخه غواړي چې د پوهنې په لسیزه کې د ښوونې او روزنې د ودې په لاره کې برخه واخلي او په ښوونځي کې له ښوونځي څخه د باندې ماشومانو د شاملولو، له ښوونځیو څخه د ساتنې، د ښوونکو له تدریس او د زده کوونکو له حاضرۍ څخه د څارنې په برخه کې هر اړخیزه مرسته وکړي.