د پوهنې وزارت د مرکزي رئیسانو او نیز مجلس دائر شو
د سه شنبې په ورځ (۵/۸/۱۴۴۳هـ ق ) له غرمې وروسته د پوهنې وزارت د غونډو په تالار کې د یاد وزارت د سرپرست وزیر شیخ القرآن والحدیث مولوي نورالله منیر صاحب په مشرۍ د یاد وزارت د مرکزي رئیسانو (۲۸) مجلس دائر شو .
په دې مجلس کې چې د یاد وزارت په مرکزي رئیسانو برسیره معینانو هم برخه درلوده، د یاد وزارت د سرچینو او ادارې معینیت د معین شیخ الحدیث خلیفه سعیداحمد شهیدخیل صاحب په مشرۍ ټاکل شوي هیئت ته دنده وسپارل شوه، ترڅو له مالیې وزارت سره د بالمقطع کارمندانو د قراردادونو د تجدید او همدارنګه د ریاست الوزراء د اداري معاونیت له مشرتابه سره د پوهنې وزارت لپاره د امتیازي او NTA معاشاتو د سهمیې د زیاتوالي موضوع شریکه کړي او یاده موضوع تر پایه تعقیب کړي.
د یاد وزارت د نشراتو او عامه اړیکو د ریاست د رئیس عزیزاحمد ریان په مشرۍ له پنځو ریاستونو (نشرات، تدارکات، مالي، خدمات، تقنین او پالیسي) څخه متشکل هیئت ته دنده وسپارل شوه، ترڅو په مرکز او ولایاتو کې د استهلاک شویو کتابونو او قرطاسیې د بیا استعمال لپاره یوه طرحه ترتیب او د وزارت د مشرتابه مجلس ته یې وړاندې کړي.
په مرکز او ولایاتو کې د مامورینو د استخدام لپاره چې مخکې د تعیناتو د کمېسون له لوري کومه طرحه جوړه شوې وه، پرېکړه وشوه چې دغه طرحه به د یاد وزارت د مشرتابه له مجلس سره شریکیږي،ترڅو یاده طرحه تصویب یا تعدیل شي او یا د یادې طرحې په رڼا کې یوه بله طرحه ترتیب شي. همدارنګه د مشرتابه مجلس ته دنده وسپارل شوه ترڅو په ښوونځیو کې د دیني مضامینو د استادانو په حیث د دیني علماوو او حافظانو د توظیف او ګمارنې لپاره یوه طرحه ترتیب کړي.
غونډه د یاد وزارت د ښوونې او روزنې معینیت د معین الحاج مولوي سخاءالله سعید صاحب له لوري د دعائیې په لوستلو سره پای ته ورسیده .
