دایچوپان ولسوالۍ کې تړلې شپز ښوونځي پرانېستل شول
د زابل ولایت په دایچوپان ولسوالۍ کې له تېرو ۱۸ کلونو راهیسې د تړلیو شپز بابه ښوونځيو دروازې بېرته د زده کوونکو پرمخ پرانېستل شوې. دغه ښوونځي د زابل د پوهنې ریاست او د سیمې قومي مشرانو په هلو څلو بیرته پرانیستل شوي دي.
د یاد ولایت د پوهنې رییس نصرالله زاهد وايي، چې د سیمې د اوسېدونکو په هلو ځلو او غوښتنو یې ددغو ښوونځيو بیا پرانېستو ته زمینه برابره کړې او هیله ښيي، چې له پرانېستو سره به یې له ښوونځي محرومو سلګونو زده کوونکو ته د زده کړو آسانتیاوې برابرې شي.
ښاغلی زاهد زیاتوي، چې پوهنې ریاست هڅه کوي د یادو ښوونځيو زده کوونکو ته درسي کتابونه، قرطاسیه او نورو درسي توکي هم برابر کړي، څو وکولای شي په ښه توګه خپلو زده کړو ته دوام ورکړي .
د دایچوپان اوسېدونکو هم په دې تړاو جوړو شویو مراسمو کې د ښوونځيو له بیا پرانېستو خوښي وښوده او ژمنه یې وکړه، چې د خپلو اولادونو د ښې راتلونکې لپاره به د معارف په وده او پیاوړتیا کې هیڅ ډول هڅې ونه سمپوي.
