د بلخ ولایت د «ابوالمطیع بلخي دارالعلوم» څخه ۱۵ تنه طلاب فارغ شول
د مزارشريف ښار د «ابوالمطیع بلخي دارالعلوم» له لویې دورې څخه ۸ تنه او د حفظ له دورې ۷ تنه طلاب فارغ او د یو لړ شانداره مراسمو په ترڅ کې یې پر سرونو باندې د فضیلت پګړۍ وتړل شوې.
په یاده پرتمینه غونډه کې د بلخ پوهنې مسئولينو، د سيمه ييزو ارګانونو د ادارې استازو، ديني علماوو، قومي مشرانو او د طلابو د کورنيو غړو ګډون درلود.
د مزارشريف ښار پوهنې آمر حافظ مولوي محمد نعيم بلخي او يو شمېر علماوو د یادو طلابو د فراغت له امله خوښي څرګنده کړه او فارغانو ته يې د مبارکۍ ترڅنګ، د علماوو د مقام په اړه خبرې وکړې او د هیواد په آبادۍ کې یې د دیني او عصري علومو پر زده کړو ټینګار وکړ.
د غونډې ګډون والو د خپلو اولادونو لپاره د زده کړو په برخه کې د لا زیاتو آسانتیاوو په برابرولو خوښي څرګنده او ژمنه یې وکړه، چې له ښوونیز نظام سره به خپله مادي او معنوي همکاري لا پیاوړې کوي.
په پای کې پر فارغانو پر سرونو د پګړیو تړلو ترڅنګ ستاینلیکونه هم ووېشل شول.
