د لوګر په یو شمېر ښوونځیو کې د نیالګیو اېښودو کمپاین پیل شو
د لوګر د مرکز او ولسوالیو په یو شمېر ښوونځیو کې د میوه لرونکو او زینتي نیالګیو کېنولو پسرلنی کمپاین پیل شو.
په همدې موخه په جوړو شویو مراسمو کې، چې د حضرت عمرفاروق(رض) د هلکانو په لېسه کې جوړه شوې وه د پوهنې رئیس عبدالوکیل کلیوال او د دې لېسې آمر لطف الله ستانکزي برخه اخیستې وه.
په ښوونځیو کې د نیالګیو کېنولو یاد کمپاین، چې د زرغون ښوونځي په نوم نومول شوی د پوهنې وزارت د لارښوونې له مخې پیل شو.
د دغه کمپاین له لارې به په ښوونځیو کې شاوخوا ۵ زره میوه لرونکي او زینتي نیالګي د ښوونځیو د زرغونتیا په موخه کېښودل شي.
د لوګر د پوهنې رئیس عبدالوکیل کلیوال د یاد کمپاین د پیل پر مهال د ښوونځیو مدیران، سرښوونکي ښوونکي او زده کوونکي وهڅول، چې د ښوونځيو د زرغونتیا په کمپاین کې برخه واخلي.
هغه د لوګر له ټولو اوسېدونکو غوښتنه وکړه، چې د اسلامي او اخلاقي مسولیت له مخې په ښوونځیو کې د نیالګیو په کېنولو کې ورسره همکاري وکړي.
د یاد کمپاین په پای کې د پوهنې رئیس د بي بي آمنې او تجربوي لېسو ته ولاړ او په دغو دواړو لېسو کې یې هم یو شمېر نیالګي کېنول.
د یادونې وړده،چې د لوګر په ښوونځیو کې تېر کال هم شاوخوا ۵ زره میوه لرونکي او زینتي نیالګي کېنول شوي دي.
