د پوهنې وزارت اونیز اداري مجلس دایر شو
د پوهنې وزارت (۳۹) ګڼه اونیز اداري مجلس د یاد وزارت د سرپرست وزیر شیخ مولوي نورالله منیر په مشري،په داسي حال کې چې د یاد وزارت معینانو او مرکزي رئیسانوپکې ګډون درلود، دایرشو.
یاد مجلس چې د قرآنکریم د څو مبارکو ایاتونو په تلاوت سره پیل شو، له هیواد څخه بهر د پوهنې له وزارت سره د ثبت شویو دولتي او خصوصي ښوونځیو د فعالیت د جواز او د هغوی د تعلیمي اسنادو د ارزیابي، د هیواد لري پرتو او محرومو سیمو ته د بهرنیو او کورنیو مؤسساتو او خیریه بنسټونو د تعلیمي خدماتو د غزولو، د بشري سرچینو لوی ریاست ته د پوهنې وزارت د اړوندو مرکزي ریاستونو د نویو تعیناتو د لېږلو او دې ته ورته نورو مسایلو په هکله پکې تفصیلي بحثونه او پرېکړې وشوې او د هرې موضوع لپاره ځانګړي هیئتونه وټاکل شول. غونډه د دعائیې په لوستلو سره پای ته ورسیده.
