د کونړ په ښوونځیو کې د ۷۰ مسلکي ښوونکو د ګومارنې پروسه پیل شوه
د پوهنې وزارت، کونړ: د کونړ ولایت د نجونو او هلکانو په یو شمېر ښوونځیو کې د ۷۰ نارینه او ښځینه مسلکي ښوونکو د ګومارنې پروسه پیل شوه.
په هغه غونډه کې چې په همدې موخه د یاد ولایت دپوهنې په ریاست کې جوړه شوي وه، د پوهنې رییس مجیب الرحمن همدرد سربېره، د پوهنې ریاست مسؤلینو او یو شمېر ښوونکو ګډون درلود.
د غونډې په پیل کې د پوهنې رییس ټولو هغه ښوونکو ته چې په یاده پروسه کې بریالي شوي، مبارکي وویله او زیاته یې کړه : د ښوونکو مسلک ډېر پاک او سپېڅلی دی، تاسې کوښښ وکړﺉ، چې دغه دنده په ډېر اخلاص او صداقت مخې ته یوسئ.
د یادونې وړ ده چې نوموړي ښوونکي د اداري اصلاحاتو او ملکي خدمتونو د خپلواک کمېسیون له لوري د کانکور آزموینې له لاري د ښوونکو خالي بستونو ته نوي بریالي شوي، چې د کونړ د مرکز او اړونډه ولسوالیو په ښوونځيو کې به وګومارل شي.
د نوموړو ښوونکو په ګومارنې سره به په ښوونځیو کې د مسلکي ښوونکو د کمښت ستونزه تر یوه حده هواره شي او هم به د مسلکي ښوونکو په شمېر کې ډېروالی راشي.
