له ولایتونو څخه د پوهنې خبرونه
ارزګان
د پوهنې وزارت د نتایجو او شهادتنامو ریاست پلاوي ارزګان ولایت ته د شهادتنامو د برېښنایي سیستم د فعالولو په موخه کاري سفر وکړ
د یاد ولایت د پوهنې رئيس الحاج مولوي شمس الله کامران آخندزاده د پوهنې وزارت له نیک اقدام څخه د هرکلي ترڅنګ زیاته کړه چې د دې سيسټم په فعالولو سره به زده کوونکي په ډېر کم وخت کې خپل اسناد ترلاسه کړي.
کندز
د کندز ولایت د پوهنې رئیس الحاج مولوي محمد اسماعیل ابو احمد قلعه ذال ولسوالۍ ته د یوه کاري سفر په ترڅ کې د دې ولسوالۍ یو شمېر ښوونځیو له اداري چارو څخه کتنه وکړه او له مسئولینو یې وغوښتل چې مرسته شوي ښوونیز توکي پر زده کوونکو په عادلانه توګه ووېشي.
نورستان
د نورستان ولايت د پوهنې رئيس مولوي تاج محمد مطمئن د دې رياست له آمرینو او مدیرانو سره د لیدنې په ترڅ کې د ښوونځيو او مدارسو د زده کوونکو د کره احصاییې د راټولولو او یو لړ نورو اړینو موضوعاتو په اړه خبرې وکړې.
پنجشیر
د پنجشير ولايت د پوهنې رئيس مولوي غلام ایشان حماس د دې ریاست له مرکزي څانګو څخه لیدنه وکړه او د کارکوونکو فعاليتونه یې وارزول.
د یو بل خبر له مخي:
د پنجشېر ولايت د پوهنې رئيس د دې ولايت په رخه ولسوالۍ کې د پياوشت د نجونو له ښوونځي څخه لیدنه وکړه او مسئولینو ته یې لازمې لارښوونې وکړې.
