له ولایتونو څخه د پوهنې فعالیتونو په اړه د څو خبرونو لنډیز

سمنګان

د سمنګان ولايت پوهنې ریاست په لارښوونه د مدارسو د استادانو ۴۰۸ بستونو د بیا کتنې او وېش په موخه مشورتي غونډه جوړه شوه.
په دې غونډه کې د یاد ولایت سرپرست، علماوو او د پوهنې ریاست مسئولینو د مدارسو لپاره د نويو بستونو د تطبیق او وېش په اړه تفصيلي خبرې وکړې.
د دغه ولايت سرپرست والي مولوي داد خدا خادم د ټولنې په پرمختګ کې د علماوو رول مهم وباله او له هغوى يې وغوښتل، چې له دې فرصت څخه په استفادې سره د هېواد د بچیانو په سالمه روزنه کې هلې ځلې وکړي.
ورپسې د سمنګان ولایت د پوهنې رئیس، الحاج مولوي نصرت الله فیضاني وویل، د اسلامي زده کړو د مرکزونو له ۱۰۰ زره بستونو څخه د دې ولایت د مدارسو لپاره ۴۰۸ بستونه ځانګړي شوي چې له ارزونې وروسته به په يادو بستونو کې وړ کسان وګمارل شي.

پروان

د پوهنې وزارت د څارنې او ارزونې ریاست څارونکي ټېم د پوهنې ریاست د فعالیتونو د څېړنې په موخه پروان ولایت ته سفر وکړ.
ټاکل شوې چې ياد ټېم به په مرکز او ولسوالیو کې د پوهنې ریاست له اداري او تدریسي چارو څخه څارنه وکړي او پایلې به یې د پوهنې وزارت له مشرتابه سره شریکې کړي.
د پروان ولايت د پوهنې رئيس، مفتي محمد حسن حقاني د څارنې ياد پروګرام د ښوونيزو چارو د چټکتيا او ښه والي لپاره مهم وبلل او د هر راز همکارۍ ډاډ يې ورکړ.
په دې کتنه کې د پوهنې وزارت د څارنې او ارزونې ټېم د یادې پروسې په اړه معلومات وړاندې کړل او د پوهنې ریاست له همکارۍ يې مننه وکړه.

لوګر

د لوګرولايت پوهنې ریاست د ښوونکو ۱۴۰ خالي بستونه آزادې سیالۍ ته وړاندې کړل.
د دې رياست د مسؤلينو د څرګندونو له مخې: په اعلان شويو بستونو کې ښځې هم کولى شي چې نوم ليکنه وکړي او په رقابتي آزموينه کې ګډون وکړي.

تخار

د پوهنې وزارت د څارنې او ارزونې ریاست څارونکی ټېم د تخار ولایت د پوهنې ریاست د کارونو او فعالیتونو ارزونې په موخه هغه ولایت ته تللی او ټاکل شوې چې په مرکز او ولسوالیو کې د تخار ولایت د پوهنې ریاست اداري او تدریسي چارې وڅاري او خپل کاري راپور د وزارت له مشرتابه سره شریک کړي.