په پکتیکا ولایت کې د یوه ښوونیز مرکز د بنسټ ډبره کېښودل شوه

د پکتیکا ولایت وازه خوا ولسوالۍ کې، د پوهنې ریاست مشرتابه، دیني علماوو، قومي مشرانو او د ملکي او نظامي ادارو د یو شمېر مسئولینو په ګډون د یو لړ مراسمو په ترڅ کې، د یوه ښوونیز مرکز د بنسټ ډبره کېښودل شوه. 
یاد ښوونیز مرکز چې د ندوة الطیبین په نوم یادیږي، په ۲.۸ جرېبه ځمکه کې، د پوهنې دوست  شخصیت مولوي عبدالمالک سعید په مالي لګښت جوړیږي.
ويل کيږي چې په یاد ښوونیز مرکز کې د عصري او ديني علومو د تدريس لپاره دوه جلا ځايونه په پام کې نيول شوي دي.
په یادو مراسمو کې ویناوالو د ژوند د چارو په تنظيمولو او د ټولنې د پرمختګ په لاره کې د پوهنې او ساينس په اهميت خبرې وکړې او د علمي او تحصيلي بنسټونو جوړول يې د خيريه کارونو يوه برخه وبلله.
د سيمې اوسېدونکي هم د یاد علمي مرکز له جوړېدو خوښ دي او وايي، چمتو دي چې خپل ماشومان د دیني او ساینسي علومو د زده کړې لپاره یاد مرکز ته ولېږي.
یاد مراسم د دعائیې په لوستلو سره پای ته ورسېدل.