په کنړ کې د یو ښوونځي ودانۍ پرانېستل شوه
پوهنې وزارت_کنړ: د کنړ ولایت د سرکاڼو ولسوالۍ اړوند د پشد بېلې د لومړني ښوونځي ودانۍ دیو لړ مراسمو په ترڅ کې ګتې اخیستنې ته وسپارل شوه.
د یاد ښوونځي نوې ودانۍ په پاخه او اساسي ډول په یو پوړ کې جوړه شوې، چې ۱۰ درسي ټولګي، ۴ اداري خونې، یو لابراتوار، یوه تحویلخانه ، د احاطي دیوال، ۶ غرفی تشنابونه او نورې اړوندې ټولې آسانتیاوې لري. د یاد ښوونځي پر نوې ودانۍ د پوهنې وزارت د پرمختیایی بودجی ځخه څه دپاسه ۱۹ میلیونه افغانۍ لګښت راغلی دی.
په همدې تړاو جوړه شوې غونډه کې دکنړ ولایت والي عبدالستار ميرزکوال ، د ولایتي شورا وکیلانو، قومي مخورو، دیني علماوو، ځوانانو او د یاد ښوونځي ښوونکو او زده کوونکو ګډون درلود.
والي په خپلو خبرو کې د ښوونځي د نوې ودانۍ د پرانېستو له امله د سیمې اوسېدونکو ته مبارکي وویله او له ولسونو یې وغوښتل، چې د خپلو ماشومانو د ښوونې او روزنې په برخه کې جدي هڅې وکړي. او هیله یې وښوده، چې ددې ولایت د پوهنې په برخه کې د پلان شویو پروګرامونو له عملي کېدو سره به موجوده ستونزې او ننګونې تر یوه بریده هوارې شي.
د کنړ د پوهنې رییس استاد مجيب الرحمان همدرد د په دې تړاو جوړو شویو مراسمو کې وویل، چې له پوهنې د ملاتړ کال په ترڅ کې هڅه کوي ددې ولایت په ټولو برخو کې د ښوونې او روزنې روان بهیر ته لازمه وده او پرمختګ ورکړي. دی زیاتوي، چې د یاد ښوونځي د نوې ودانۍ پرانېستل ددې ولایت د پوهنې د کیفیت لوړېدو برخه کې یوه ښه بېلګه ده او هڅې یې دادي چې په دې برخه کې تر پخوا خپلې هلې ځلې ګړندۍ کړي.
