د لغمان ولایت په تودو سیمو کې د زده کوونکو څلور نیم میاشتنۍ آزموینې پیل شوې
د پوهنې وزارت، لغمان: د لغمان ولایت د تودو سیمو د یولسم او دولسم ټولګیو څلورنیم میاشتنۍ آزموینې پیل شوې.
په هغه غونډه کې چې د لغمان ولایت د مرکز اړوند د مستوري د نجونو په لیسه کې جوړه شوي وه د ولایت د مقام مرستیال والي الحاج شهزاده مظلوم یار وویل چې شفافیت، د آزموینې په صحنه کې نظم او دسپلین مراعات کول او حق حقدار ته ورکول زما هیله ده.
همدارنګه د پوهنې رییس عبدالله حمیدي په خپلو خبرو کې لومړۍ ټولو ښوونکو او زده کوونکو ته په بریالیتوب سره د ښوونیز کال د څلور نیمو میاشتو درسي بهیر په بریالیتوب سره پای ته رسیدو له امله مبارکي وویله او د هغوی له کورنیو نه یې مننه وکړه چې دوی ته یې د زده کړو تر سره کولو زمینه برابره کړه.
د لغمان د پوهنې رییس د سیمې په مشرانو غږ وکړ چې د خپلو اړوندو ښوونځیو سره په هره برخه کې چې کولای شي مرسته وکړې. نوموړي وویل له ښوونځیو سره مرسته ستاسو د خپلو اولادونوسره مرسته ده.
د یاونې وړ ده چې د لغمان ولایت د تودو سیمو د زده کوونکو څلور نیم میاشتنی آزموینه په ۹۸ ښوونځيو کې اخیستل کیږي چې ۸۹۸۸ تنه نجونې او هلکان په دې آزموینه کې برخه لري.
