هلمند ولايت کې مرکز پورې اړونده د نجونو د ښوونځي ۱۱۳ جوړې میزونه او چوکۍ ورغول شوې
د پوهنې وزارت، هلمند : د هلمند د پوهنې ریاست د خدماتو مدیریت له لوري د مرکز لښکرګاه ښار د ټولو ښوونځیو له کاره لویدلي ميزونه او چوکۍ رغول کیږي، چې په روانه لړۍ کې په مرکز پورې اړونده د نجونو ښوونځي ته ۱۱۳ جوړې میزونه او چوکۍ ورغول شوې.
د هلمند د پوهنې رئیس محمد داؤد شاه صفاري وایي چې له پلان سره سم د میزونو او چوکیو د رغونې په پیل شوې لړۍ کې د تیرو دوو اوونیو په لړ کي ۱۱۳ جوړې میزونه او چوکۍ د ۳۳۹ تنه زده کوونکو د ناستې په پار ښوونځي ته وسپارل شوې.
ښاغلی صفاري زیاتوي چې د مرکزي ښوونځيو تر څنګ به د نورو ښوونځیو له کاره لویدلي میزونه او چوکۍ ورغول شي او د زده کوونکو په واک کي به ورکړل شي.
د هلمند د پوهنې رئیس له ټولو زده کوونکو غوښتنه وکړه چي د ښوونځیو د ټولو برخو ساتنه وکړي، تر څو په راتلونکي کې د میزونو او چوکیو له نشتون سره مخ نه شي.
د یادونې وړ ده، چې د هلمند د پوهنې ریاست د خدماتو مدیریت اړوند نجار خونې له لوري تر دې مهاله ۳۳۴ جوړې میزونه او چوکۍ رغول شوې دي چې څه باندې زر تنه زده کوونکو ترې ګټه اخلي.
