ننګرهار ولایت کې د پوهنې ریاست او (HHRD) موسسې تر مینځ د مرستو هوکړه لیک لاسلیک شو

د پوهنې وزارت، ننګرهار: د ننګرهار ولایت د پوهنې ریاست او (HHRD) مرستندویه موسسې ترمینځ د مرستو تړون لاسلیک شو.

په هغه غونډه کې چې په همدې موخه جوړه شوې وه، د پوهنې رئیس حسیب الله شینواري وویل: یاده اداره به د ننګرهار ولایت بټي کوټ،هسکې مینې، کامې او مومندرې ولسوالیو کې له ۱۶۰۰ تنو زده کوونکو سره د قرطاسیې او د لوبو سامان مرسته وکړي.

د پوهنې رئیس زیاته کړه: دغه مرستندویه موسسه به، په جلال اباد ښار او سرخ رود ولسوالۍ کې د ۳۵۰ تنو یتیمو زده کونکو کفالت هم پرغاړه واخلي.

همدارنګه د (HHRD) موسسې مشر ذبیح الله شیرزاد وویل: د پوهنې ریاست سره د شوي تړون له مخې به، په شیرزاد او حصارک غلجایي ولسوالیو کې له ۳۰۰ تنو اړمنو زده کونکو سره هم د قرطاسیې مرسته وکړي.

همداراز نوموړي زیاته کړه چې په راتلونکي کې به هم د پوهنې ریاست سره هراړخیزې مرستې وکړې.