هېواد ته د سکهانو د ماشومانو زده کړو لپاره لازم تدابير په پام کې نیول شوي
د پوهنې وزارت د ښوونې او روزنې معين ډاکټر عطاالله واحديار، نن له غرمې مخکې له سناتورې انار کلي هنريار سره، په خپل کاري دفتر کې ليدنه وکړه.
په ليدنه کې د نورو موضوعاتو ترڅنګ، زموږ د هيواد سکهانو ته د ښوونيزو او روزنيز چوپړتياو برابرولو په اړه خبرې اترې وشوې.
په دې ليدنه کې زموږ د هيواد سکه او هندو اوسيدونکو ته او په ځانګړي ډول هغو سکه هيوادوالو ته د ښوونيزو او روزنيزو چوپړتياو برابرولو په اړه خبرې و شوې، چې په دې وروستيو کې هيواد ته راستانه شوي دي.
د ښوونې او روزنې معين د پورتنۍ موضوع اړوند، دا لاندې ژمنې وکړې:
۱. هغه راستانه شوي سکه زده کوونکي چې تعليمي اسناد لري، ښوونځيو ته به معرفي کيږي
۲. خو هغو زده کوونکو چې په خصوصي ډول زده کړې کړي، هغوى د تعليمي کچې د تثبيت تر آزموينې وروسته به ښوونځيو ته معرفي شي.
۳. هغه کورنۍ چې خپل استوګنځي ته نيږدې ښوونځي نه لري، نو پوهنې مکلف دى چې له امکاناتو څخه په ګټې اخيستنې سره، په اړوندو سيمو کې ماشومانو ته درسي ټولګي جوړ کړي.
په ورته وخت کې د سکه هيوادوالو استازې انار کلي هنريار، د پوهنې وزارت له پاملرنې مننه وکړه او د پوهنې وزارت له خپرونو يې خپل ملاتړ څرګند کړ.
