د هیواد د پوهنې دولایتي ریاستونو مالي او اداري آمرانو د پوهنې وزارت له سرپرست وزیر سره وکتل
د هیواد دپوهنې د ولایتي ریاستونو مالي او اداري آمرانو دپوهنې وزارت له سرپرست وزیر محترم شیخ مولوي نورالله منیر سره وکتل.
د یاد مجلس په پیل کې لومړی د قرآن عظیم الشان څو مبارک ایاتونه تلاوت شول، وروسته د پوهنې محترم وزیر صاحب مقدماتي خبرې وکړې، راغلیو آمرصاحبانو ته یې ښه راغلاست ووایه، په تعلیمي ډګر کې یې د دوی ځلې او خدمتونه وستایل. وروسته د آمر صاحبانو په استازیتوب د ننګرهار دپوهنې ریاست مالي او اداري آمر محترم غلام فاروق فضلي او د کندز د پوهنې ریاست مالي او اداري آمر محترم صالح محمد نیک مل خبرې وکړې او په ولایاتو کې د ځینو نا بشپړه تعلیمي پروژو، د درسي کتابونو د کمښت، د دارالایتامونو د تمویل، د پوهنې دولایتي مسئولینو او کارمندانو لپاره د هغوی د کاري وړتیا د لوړولو په موخه د سیمینارونو د دایرولو او دې ورته نورو موضوعاتو په هکله یې له محترم وزیر صاحب سره خپل وړاندیزونه شریک کړل.
د مجلس په پای کې محترم وزیر صاحب ژمنه وکړه، چې دپوهنې وزارت به د ولایاتو د یادو ستونزو د حل او وړاندیزونو د اجراء په برخه کې پوره پوره هڅه کوي او اړونده مراجعو ته به سپارښتنه کوي، چې ژر تر ژر یادو ستونزو ته د حل لارې چارې ولټوي.
