مرکز او ولایتونو کې د پوهنې په اړه څو لنډ خبرونه

نورستان:
د نورستان ولایت د کامدیش ولسوالۍ د پوهنې آمر مولوي مجیب الرحمن ثوبان د دې ولسوالۍ د ناګل عالي لېسې او علوم مدرسې له تدریسي او اداري چارو څخه لیدنه او څارنه وکړه.
 په دې کتنه کې نوموړي زده کوونکي د دې هېواد د راتلونکي جوړونکي او استادان یې د وطن معماران وبلل.
لغمان:
 د تعلیمي نظارت غړو، د لغمان ولایت د ښاري حوزې آمر د لغمان ښار د یو شمېر ښوونځیو د زده کوونکو، استادانو او یو شمېر نورو اداري او تدریسي مسایلو څخه څارنه وکړه.
 د دغې غونډې په دوام کې د يادو ښوونځيو له مسوولينو سره د کميټې غونډه وشوه او د چارو د لا ښه والي په خاطر يې لازمې لارښوونې و کړې.
بلخ:
د پوهنې وزارت د څارنې او ارزونې بورډ د بلخ د پوهنې ریاست د ۱۴۰۰ کال د فعالیتونو د ارزونې په ترڅ کې د دغه ریاست د عمومي مدیرانو له یوې ډلې سره ناسته وکړه او د اداري کارونو د ښه والي او د قانون د تطبیق په موخه یې لازمې لارښوونې او سپارښتنې وکړې. .
کابل:
د کابل ښار د پوهنې رئیس مولوي احسان الله خطاب تر خپل نفوذ لاندې د ښار د پوهنې ریاست د کارکوونکو د کاري ستونزو په اړه یې بحث وکړ او د ستونزو د حل په موخه یې اړونده ادارو ته لازمې لارښوونې وکړې.
په یو بل خبر کې:
د اغاخان انستیتیوت په مرسته د کابل د پوهنې ریاست په تالار کې د ښوونکو او د ښوونځیو د مدیرانو لپاره غونډه جوړه شوه. د زلزلې له خطرونو څخه د ژغورنې په لارو چارو بحث وشو. چې څنګه کولای شو ځان او نور د زلزلې له خطرونو وژغورو؟ پوهاوی ورکړل شو.
لغمان:
د اخلاص خیریه بنسټ له خوا په لغمان ولایت کې پر ۲۰۰ نارینه زده کوونکو او ۲۰۰ ښځینه زده کوونکو باندې درسي مواد ووېشل شول.
 د دغه ولايت د پوهنې رييس د دغې ادارې له مسوولينو څخه د مننې په ترڅ کې د دغو مرستو د دوام غوښتنه وکړه.
کاپیسا:
د ښوونکو د مسلکي ودې تر نامه لاندې لس ورځنی ښوونیز سیمینار چې څه موده وړاندې د پوهنې وزارت د ښوونکو د مسلکي ودې د څانګې د تخنیکي ټیم په همغږي د یونیسف ادارې په مالي مرسته جوړه شوې وه. د کاپیسا ولایت د کوهستاناتو په حصه اول ولسوالۍ کې د استاد شهید عبدالصبورفرید روزنیز بهیر پای ته ورسید.
د دغه سیمینار د جوړیدو موخه د مسلکي مهارتونو لوړول، ظرفیت لوړول، د تدریس د نویو میتودونو روزنه، د ټولنې مدیریت، د تدریس په برخه کې د مهمو مفاهیمو او عناصرو رابرسیره کول دي.
دغه راز د کاپيسا ولايت د پوهنې رياست د ښاري پوهنې رييس د زلمي شهيد له منځني ښوونځي څخه ليدنه وکړه. نوموړي زده کوونکي یې وهڅول چې زده کړې وکړي او استادان دې په صادقانه توګه خدمت وکړي.