له ولایتونو څخه د پوهنې خبرونه
پروان
د پروان ولایت د پوهنې ریاست سکتوري غونډه د دغه ولایت د پوهنې د رئیس مفتي محمد حسن حقاني تر څارنې لاندې د یاد ریاست د مسوولینو، د تخنیکي او مسلکي زده کړو ادارې، ملي تلویزون او مرستندویو بنسټونو د استازو په ګډون جوړه شوه.
په پیل کې د پوهنې رئیس د سیمه ییزو ادارو او مرستندویه بنسټونو له مرستو څخه د مننې ترڅنګ، د دې ناستې په ارزښت او اړتیا خبرې وکړې او د دغه ولایت د ښوونیز وضعیت په ښه کولو کې یې اغېزمنې وبللې.
په یاده ناسته کې د دولتي ادارو او بهرنيو بنسټونو استازو د خپلو خبرو په ترڅ کې د خپلو فعاليتونو راپور وړاندې کړ او يو ځل بيا يې د پروان له پوهنې ریاست سره د مرستو په برخه کې پر خپلو ژمنو ټينګار وکړ.
د پروان ولایت د پوهنې رئيس د مير عبدالکريم معقول د هلکانو او نجونو له لېسو څخه ليدنه وکړه او له اړوندو مسؤلينو سره يې په ليدنه کې د پوهنې د کيفيت او کميت په لوړولو ټينګار وکړ.
نوموړي د يادې شوې لېسې له زده کوونکو سره په ليدنه کې هغوى وهڅول، چې د هېواد د پرمختګ په موخه اسلامي او عصري علوم زده کړي.
بلخ
د بلخ ولایت د پوهنې رئیس الحاج مولوي عبدالجلیل شهیدخېل د دغه ولایت ولسوالیو ته د خپل کاري سفر په لړ کې دا ځل د چهاربولک ولسوالۍ د ښوونځیو له ښوونیزو او تدریسي چارو څخه څارنه وکړه.
په دې کتنه کې یې د پوهنې په برخه د ځینو نېمګړتیاوو په باب مسؤلینو ته لازمې لارښوونې وکړې.
لغمان
د لغمان ولايت د پوهنې رئيس، مولوي شاه جهان ساجد او د دغه ولايت د مهترلام ښار د پوهنې آمر مولوي عبدالرزاق سيار د سلطان ويس بابا د نجونو منځني ښوونځي له ادارې او تدريسي چارو څخه څارنه وکړه او د يادې لېسې له ښوونکو سره يې د درسونو د کیفیت په باب خبرې وکړې.
د قرغيو ولسوالۍ پوهنې آمریت وایي: د يادې ولسوالۍ يو شمېر ښوونځيو ته يې له لومړي څخه تر شپږم ټولګي پورې کتابچې او له شپږم څخه تر دولسم ټولګي پورې درسي کتابونه وېشلي دي.
