د پوهنې وزارت د ښوونې او روزنې معین جوزجان ولايت ته سفر وکړ.
د پوهنې وزارت د ښوونې او روزنې معين الحاج مولوي سخاء الله سعید د یوه لوړ پوړي پلاوي په ګډون چې د ولایتی چارو د انسجام عمومي رئیس الحاج مولوی پاینده محمد تعليم او د ښوونې او روزنې یو شمېر سلاکارانو او کارپوهانو يی هم ملتيا کوله، د هېواد شمالي ولایتونو (بلخ، فاریاب، جوزجان او سرپل) د پوهنې ریاستونو له وضعیت او د ۱۴۰۲ کال عملیاتي پلانونو د تطبيق او ارزونې په موخه جوزجان ولایت ته ورسېدل.
لومړی د پوهنې وزارت معين له یاد ریاست څخه لیدنه وکړه او د پوهنې له رئیس او مسؤلینو سره یې مفصلې خبرې وکړې.
ورپسې د پوهنې رئیس مولوي محمد طاهر جواد د پوهنې وزارت لوړ پوړي پلاوي ته ښه راغلاست وویل او د پوهنې وزارت د معين په حضور کې یې د دغه ریاست د کړنو په اړه مفصل راپور وړاندې کړ.
د پوهنې رئيس د چارو دښه والي په برخه کې ددغه رياست شته ستونزې او ننګونې شریکې کړې او د حل په موخه یې لازم وړانديزونه وړاندې کړل .
په یاده کتنه کې د پوهنې وزارت پلاوي د یاد ریاست ټول فعالیتونه او د روان کال د عملیاتي پلانونو د تطبیق هر اړخیزه ارزونه وکړه.
په پام کې ده چې د پوهنې وزارت معين او ورسره مل پلاوی په جوزجان ولایت کې لاندې پروګرامونه پلي کړي:
۱- د جوزجان ولایت د پوهنې د وضعیت هر اړخیزه ارزونه او څارنه.
۲- د مرکز او ولسوالیو په ګډون د پوهنې ریاست کارکوونکو د ورځنیو چارو د پلانونو او پر وخت اجراآتو څارنه.
۳- د مرکز او ولسوالیو د پوهنې ریاست آمرينو او مدیرانو لپاره د روزنیزو ورکشاپونو تنظیمول.
۴- په محرومو او لرې پرتو سیمو کې د مامورینو او استادانو د ګمارنې څېړنه.
په پای کې د پوهنې رئیس د دغه ولایت ښوونیز وضعیت ته د پوهنې وزارت د رهبرۍ له پاملرنې خوښي څرګنده کړه او د پوهنې وزارت د پرېکړو او عملياتي پلانونو په تطبیق کې يې د پوهنې ریاست په هلو ځلو ټینګار وکړ.
