د سویل لویدیز زون اړوند ولایتونو د پوهنې ریاستونو د نشراتي مدیرانو د وړتیاوو لوړونې مسلکي او علمي ورکشاپ پای ته ورسېد
هغه مسلکي او علمي ورکشاپ چې دوه ورځې وړاندې د پوهنې وزارت د نشراتو او عامه اړیکو ریاست د مسئولینو او روزونکو له لوري د هېواد د سویل لویدیز زون (هرات، غور، بادغیس او فراه) ولایتونو د پوهنې ریاستونو د خپرونو او درسي کتابونو د وېش مدیرانو لپاره جوړ شوی ؤ، پای ته ورسېد.
د یاد ورکشاپ د پای مراسم د قرآن عظیم الشان د څو مبارکو آیتونو په تلاوت سره پیل شول او ورپسې د هرات ولایت د پوهنې ریاست د سرچینو او ادارې آمر مولوي محمد اسماعیل مظفري هر اړخیزې خبرې وکړې.
دغه راز نوموړي هیله څرګنده کړه، چې ګډون والو به د دغه ورکشاپ له محتوا څخه په خپلو ورځنيو چارو کې اعظمي ګټه پورته کړي.
همدارنګه د هرات ولایت پوهنې ریاست د سرچینو او ادارې آمر د یاد ورکشاپ د تمویل کوونکې ادارې او همدارنګه د پوهنې وزارت د نشراتو او عامه اړيکو رياست د مسئولينو او روزونکو له ټېم مننه وکړه او په راتلونکي کې يې د دا ډول علمي او مسلکي غونډو پر دوام ټينګار وکړ.
د غونډې په دوام د یاد عملي ورکشاپ د مالي او تخنیکي ملاتړې ادارې په استازیتوب عزیز بېک فایض او عبدالکریم عابد خبرې وکړې او د پوهنې د کارکوونکو د وړتیاوو د لوړولو په ځانګړي ډول د نشراتو او عامه اړیکو په برخو کې یې د خپلو همکاریو د دوام ډاډ ورکړ.
یاد ورکشاپ ګډون والو ته د ستاینلیکونو په وېشلو او دعائیې په لوستلو سره پای ته ورسېده.
