په غزني ولایت کې یو شمېر ښوونځي او مدارس ترمیم او رغول شوي دي
د غزني ولایت د پوهنې ریاست د پلان له مخې دروان ۱۴۰۲ لمریز کال په ترڅ کې، د پوهنې وزارت له بودیجې، د همکارو بنسټونو او عامو خلکو په مالي ملاتړ ۲۷ بابه ښوونځي او مدارس ترمیم او رغول شوي دي.
د ياد ولايت د پوهنې مسئولين وايي، چې د دغو پروژو ټولییز لګښت ٤١ ميليونه او ٩٩٧ زره افغانۍ وو، چې له دې جملې څخه يادې پيسې د پوهنې وزارت له بوديجې، د همکارو بنسټونو او عامو خلکو له لوري ورکړل شوې دي.
د غزني ولایت پوهنې رئیس الحاج مولوي میر نصیر احمد حسیني د پوهنې په برخه کې د یادو بنسټونو له همکارۍ او د غزني علم پال ولس له مرستو مننه وکړه او له نورو شتمنو هېوادوالو یې وغوښتل، تر څو د پوهنې په برخه کې خپل اسلامي او ملي مسئولیت اداء کړي.
دغه راز نوموړي ښوونیز نظام د ټولنې او هېواد د پرمختګ بنسټ وباله او څرګنده یې کړه چې په یاده برخه کې به خپلې هڅې لاپسې ګړندۍ کړي.
