په کاپیسا ولایت کې د یو لومړني ښوونځي لپاره ځمکه ځانګړې شوه
د هېواد په مرکز او ولایتونو کې له ښوونیز نظام څخه د خلکو د ملاتړ په دوام، دا ځل د کاپیسا ولایت د پوهنې یو تن دوست شخصیت، د یاد ولایت پوهنې ریاست ته خپله ۶۰۰ متره مربع ځمکه وقف کړه.
د کاپیسا پوهنې رياست مسئولين، د دغه ځمکې ارزښت ۳۰۰ زره افغانۍ بولي او د یاد ولايت له اوسېدونکي عبدالبصير څخه يې مننه وکړه، چې خپل شخصي ملکيت يې د پوهنې برخې ته ځانګړی کړی دی.
د پوهنې مسئولین وایي: زموږ دغه هېوادوال ياده ځمکه د قلعه سيدخان د نجونو لومړني ښوونځي لپاره د ودانۍ جوړولو ته وقف کړې ده.
له بلې خوا د کاپيسا ولايت د پوهنې رئيس مولوي محمد فريد حقاني، د هېواد د بچيانو لپاره د متوازنو ښوونيزو خدمتونو وړاندې کول د هېوادوالو بنسټیز حق وباله او ژمنه يې وکړه، چې په یاده برخه کې به خپلې هڅې لاپسې ګړندۍ کړي.
