له ولایتونو څخه د پوهنې څو مهم خبرونه
هرات
د هرات ولایت پوهنې ریاست د سیمه ییزه مشرانو، علماوو او د ښوونځیو شوراګانو له غړو سره، د ښار په څلورمه ناحیه کې «د خلکو او پوهنې» تر نامه لاندې د ګډو خبرو اترو غونډه جوړه کړه.
نمیروز
په نیمروز ولایت کې د سیرت النبي «صلی الله علیه وسلم» د سیالیو د ممتازو زده کوونکو د ستاینې مراسم، د پوهنې مسئولینو، علماوو او قومي مخورو په حضور کې ترسره شول.
یادې سيالۍ چې څو ورځې وړاندې د مرکز زرنج ښار اړوند سیستان عالي لېسې د ٨٠٠ تنو زده کوونکو ترمنځ په لاره اچول شوې وې، په ترڅ کې یې ٢٠ تنو ممتازو زده کوونکو ته جايزې او ستاينليکونو په پام کې نیول شوي وو.
بادغیس
د بادغیس ولایت د پوهنې ریاست په اډانه کې د ۲۹۰ تنو کسانو ترمنځ د آزاد رقابت سیالي ترسره شوه.
د یادې پروسې بریالي نوماندان به د دغه ولایت په مدارسو او دارالعلومونو کې د استادانو په توګه وګمارل شي.
لوګر
په لوګر ولایت کې د امر باالمعروف او نهي عن المنکر محتسبینو، د یاد ولایت د پوهنې ریاست کارکوونکو ته د اصلاحي سپارښتنو د ورکولو په ترڅ کې، له هغوی وغوښتل، تر څو خپل صورت او سیرت د اسلامي شریعت سره سم برابر کړي.
کابل
د کابل ولایت پوهنې ریاست، د یات ولایت د پغمان ولسوالۍ په پوهنې آمریت کې د ښوونکو د څو خالي بستونو د ډکولو په موخه له نوماندانو څخه رقابتي آزموینه واخیسته.
