د پوهنې وزارت د معیاري آزموینو او پایلو ارزونې ریاست پلاوي د غزني ولایت له پوهنې رئیس سره وکتل
د پوهنې وزارت د کیفیت تضمین معینیت څلور کسیزه پلاوي، چې د یو رسمي سفر په ترڅ کې غزني ولایت ته رسېدلی؛ نن یې د یاد ولایت له پوهنې رئیس الحاج مولوي میرنصیر احمد حسیني او یو شمېر کلیدي څانګو له آمرینو سره وکتل.
په دې کتنه کې دواړو لوریو د آزموينو بهير پر معياري کولو، د سوالونو بانک د تطبيق ترڅنګ، پردې پرېکړه وکړه، چې د یاد ولایت د شهید عبدالسلام، پښتون آباد ښوونځيو او د کیمیا خصوصي ښوونځي د لسم، یوولسم او دولسم ټولګيو له زده کوونکو څخه په اسلامي ښوونې او روزنې، ریاضي، بیولوژي او تاریخ مضمونونو کې معیاري آزموینه واخیستل شي.
له بلې خوا د غزني ولایت پوهنې رئیس یاد پلاوي ته د ښه راغلاست پرمهال ژمنه وکړه، چې د زده کوونکو د آزموینو معیاري کولو په برخه کې به له پوهنې وزارت سره هراړخیزه همکاري وکړي.
