د پوهنې وزارت لخوا د هېواد د ولایتونو پوهنې آمرینو لپاره د ۲۵۰ عرادې موټرسایکلونو وېش لړۍ پیل شوه
په هغو مراسمو کې چې د پوهنې وزارت لخوا د هېواد د ولایتونو پوهنې آمرینو لپاره د موټرسایکلونو وېش لړۍ د پيل په مناسبت جوړ شوي وو، پکې د پوهنې وزارت د سرچینو او ادارې معینیت د خدماتو رئیس استاد حبیب الله «خالد»، د مرکز او ولایتونو پوهنې مسئولینو او کارکوونکو برخه درلوده.
په پیل کې د پوهنې وزارت د خدماتو رئیس مېلمنو او ګډون والو ته د ښه راغلاست تر څنګ، د ولایتونو آمرینو لپاره د موټرسایکلونو وېش په تړاو معلومات وړاندې کړل او زیاته یې کړه، لله الحمد، د پوهنې وزارت په علمي ډګر کې نوښتګر او د پام وړ ګامونه پورته کړي دي، چې د نننیو وسایطو وېش پروسې پیل یې د نمونې په توګه یادولی شو.
دغه راز نوموړي له مسئولینو وغوښتل تر څو په خپلو اړوندو دندو کې له یادو وسایطو څخه سالمه او اعظمي ګټه پورته کړئ.
په ورته مهال نورو مسئولینو هم په ټولنه کې د علم او پوهې اهمیت ته په اشارې سره وویل، چې د پوهنې وزارت مشرتابه د پوهنې د کیفیت لالوړولو په برخه کې شپه -ورځ خپلې هلې ځلې جاري ساتي او په دې برخه کې به خپلو هڅو ته لاپسې دوام ورکړي.
مراسم د پوهنې وزارت د خدماتو ریاست د ترانسپورټ د آمر مولوي محمد ابراهیم "محمد" په مبارکې دعائیې سره پای ته ورسېدل.
