د لوګر او لغمان ولایتونو له ښوونځیو سره د درسي کڅوړو مرستې وشوې
د یوه همکار بنسټ له لوري د لوګر او لغمان ولایتونو له ښوونځیو سره د ۲۷۲۵ کڅوړو قرطاسیې او درسي موادو مرستې وشوې، جې له دې جملې څخه د ۹۷ زره او ۸۰۰ ډالرو په ارزښت ۱۶۷۸ کڅوړې د لغمان ولایت ښوونځیو ته او د څه کم ۶۲ زره ډالرو په لګښت ۱۰۴۷کڅوړې د لوګر ولایت ښوونځیو ته سپارل شوې دي.
په یادو موادو کې ۱۷ قلمه بېلابېل درسي توکي د ښوونکو لپاره او د درېیم ټولګي څخه تر شپږم ټولګي پورې د زدهکوونکو لپاره د لیکلو وسایل شامل دي.
همداراز د لوګر ولایت اړوند ۲۸۹ بابه ښوونځیو لپاره د یادو کڅوړو لېږد بهیر د ۲۵۵۳تنه ښوونکو او ۱۰۲ زره ۱۰۵ تنه زدهکوونکو لپاره پیل شوی دی.
دغه راز د لغمان ولایت ښوونیزو بنسټونو ته د مرستو لېږد بهیر هم تر کار لاندې دی.
همدارنګه، د یاد ولایت پوهنې ریاست ته رسېدلې مرستندویه توکي د دغه ریاست اړوندو ګدامونو ته لېږدول شوې دي او ټاکل شوې ده، چې ډېر ژر به یې د وېش بهیر هم پیل شي.
د پوهنې وزارت مشرتابه د همکارو بنسټونو له مادي او معنوي ملاتړ څخه مننه او قدرداني کوي.
