لوګر د پوهنې ریاست د هېواد د خپلواکۍ جشن ته ځانګړي تدابیر نیولي
د پوهنې وزارت ـ لوګر: د لوګر د پوهنې ریاست د هېواد د خپلواکۍ د بېرته اخېستو د سلمې کلیزې جشن د نمانځنې مراسمو ته پوره چمتوالی نیولی دی.
د لوګر د پوهنې رئیس عبدالوکیل کلیوال وایي، چې یاد تدابیر یې د پوهنې وزارت د رسمي لارښوونې له مخې په پام کې نیولي دي.
د پوهنې رئیس زیاته کړه،چې د هېواد د خپلواکۍ جشن یو ملي جشن دی او د دغه جشن د نمانځلو لپاره یې یوه غونډه را بللې ده.
هغه وویل، چې په یاده غونډه کې به د دیني عالمانو او قومي مشرانو سربېره د ښوونځیو مدیران، سرښوونکي، ښوونکي او زده کوونکي برخه ولري.
د هغه په خبره، چې د خپلواکۍ په جشن کې به زده کوونکي د هېواد د خپلواکۍ د بېرته اخېستو په ویاړ ترانې او مقالې وایي اوهم به د خوشحالیو اټنونه وشي.
د پوهنې رئیس وایي، چې په یاد ورځ به د پوهنې ریاست په ګډون په ټولو دولتي او خصوصي ښوونیزو مرکزونو کې د افغانستان درې رنګه بیرغونه وځړول شي.
د افغانستان خپلواکي په ۱۲۹۸ لمریز کال کې چې له ۱۹۱۹ میلادي کال سره سمون خوري بېرته اخېستل شوې ده.
د افغانستان استقلال شاه امان الله خان د بریتانیا له حکومته تر لاسه کړی، چې دغه ورځ هر کال په ټول هېواد کې لمانځل کېږي
