د لوګر په خروار ولسوالۍ کې یوه ښوونځي ته ځمکه وقف شوه
د پوهنې وزارت ـ لوګر: د لوګر د خروار ولسوالۍ د صدو د کلي یوه قومي مشر په خپله خوښه د یوه ښوونځي د جوړولو لپاره ځمکه وقف کړه.
دغه قومي مشر الحاج محمد صادق نومیږي، چې خپله یو نیم جریب ځمکه یې د شیخ موسی منځني ښوونځي ته وقف کړې ده.
د شیخ موسی د نجونو او هلکانو منځنی ښوونځی ۴۵ کاله مخکې تاسیس شوی، چې اوس مهال شاوخوا ۱۷۶ زده کوونکي لري.
د لوګر د پوهنې رئیس عبدالوکیل کلیوال د یادې ځمکې د قبالې اخېستلو پر مهال د قومي مشر الحاج محمد صادق کار وستایه او دا یې له ثوابه ډک کار وباله.
د لوګر د ولایتي شورا مرستیال الحاج محمد قسیم خوشیوال له یاد قومي مشر څخه مننه وکړه او د خروار ولسوالۍ اوسېدونکي یې وهڅول، چې د دغه قومي مشر په څېر ځمکو نه لرونکو ښوونځیو ته ځمکې ورکړي.
د یادونې وړده، چې په خروار ولسوالۍ کې دا مهال ۱۱ ښوونځي شتون لري، چې ټول د زده کوونکو پر مخ خلاص دي.
